Na fa’aauau pea ona tapunia le Ofisa o Femalagaaiga i le aso ananafi, ina o molimauina le iai pea i totonu o sui o vaega suesue mai i le OTICIDE, mo le fa’aauauina o a latou suesuega e pei ona faatagaina mai i se faatonuga aloaia mai i le Faamasinoga Faaleitumalo (search warrant) i le aso 6 o Ianuari.

O lenei faatonuga aloaia mai i le Faamasinoga (search warrant) sa talosagaina e le alii Loia Tutoatasi, le susuga Faamomoi Masaniai ma na amata ona faatinoina i le 8:30 i le taeao o le Aso Tofi, lea ua mafua ai ona tapunia le Ofisa o Femalagaaiga i aso e lua.

Na fa’ailoa mai e se tasi na tali ina mai telefoni a le Ofisa o Femalagaiga i le aso ananafi e faapea, e faato’a tatalaina le latou ofisa i le Aso Gafua ma o le faamatalaga lava lea e tasi na tu’uina mai e le Ofisa a le Loia Sili i le aso ananafi.

FA’AFETAIA E LE KOVANA IA LE A’AI O MANUKAU MO MEAALOFA/FOA’I AUA LE GALULOLO

Na fa’aalia le agaga faafetai a le afioga i le kovana sili, le matua ia Togiola Tulafono i le Pulenu’u o le a’ai o Manukau i Niu Sila, le susuga Len Brown, ona o se meaalofa i ni tusi se tolu o alofaaga ma faamaisega mai i tagata o le a’ai o Manukau mo tagata o Amerika Samoa, ona o le galulolo o Setema 29.

Na ta’ua e Brown i sana tusi ua tauaaoina e Togiola, o nei tusi taualofa ma faamaisega, ua na’o se auala faatauva’a e faatino ai alofa’aga ma loto momoi o tagata Manukau i le faigata na feagai ma Amerika Samoa ona o le galulolo.

O nei tusi o le a faapea ona tu’uina i totonu o faletusi ma nisi o nofoaga mo le mamalu lautele.

Na fa’ailoa mai foi e Brown i le kovana sili le aoina e taitai o le a’ai o Manukau ia se tinoitupe e $9,000 (tupe Niu Sila) mai i tagata lautele ma ua maea foi ona o latou foa’iina mai se vaegatupe e $10,000 (tupe Niu Sila).  O nei tupe o le a mafai ona foa’iina atu i le Koluse Mumu ina ia mafai ona fesoasoani i galuega mo le toe faaleleia o Samoa ma Toga.

Na fa’aalia e Togiola lona agaga faafetai i le alii Pulenu’u, o taitai o Manukau faapea ma tagata o lea a’ai ona o lo latou agaga alofa e ala i meaalofa ua mafai ona foa’iina mai.

AOTELEGA O LE MAFUI’E O LE 2009

O le mafui’e lea na luluina ai le Pasefika i le aso 30 o Setema ma maliliuina ai le silia ma le to’aselau ona o se galulolo na tula’i mai ai, i totonu o Amerika Samoa, Samoa ma Toga, o se tasi o mafui’e malosi o le tausaga e 2009, e pei ona ta’ua i faamaumauga a le USGS (US Geological Survey).

Na ta’ua e le USGS e faapea, e ui ina e le o se mafui’e mata’utia ae peitai, o se mafui’e malosi, lea na mafai ona faamauina le malosi i le 8.1.

I le to’a 192 tagata na maliliu i lenei mafuie ma le galulolo i totonu o Amerika Samoa, Samoa ma Tonga, e to’a 34 na maliliu i totonu o Amerika Samoa.

O le mafui’e pito sili ona mata’utia i faamaumauga i totonu o le 2009, o se mafui’e lea e 7.5 lona malosi sa lulu i Indonesia ia Setema 30, lea na maliliu ai tagata e to’a 1117 i Sumatra i saute.

Ua fa’aalia foi i faamaumauga a le USgs le iai o nisi mafui’e malolosi na lulu i le atu Samoa i le va o Aokuso ma Oketopa ma i mafui’e uma o le 2009, e to’a 1783 tagata o le lalolagi atoa, ua maliliu mai ai.